உயிரே

சப்த கூட்டங்களிடமிருந்து
அமைதியை நோக்கித்
தவழ்ந்துவிடு

சப்தங்கள்
சத்தான உள்ளத்துக்கும்
கடும் விசங்கள்

இந்த பூமி மடி நிறைய
மனித மொட்டுக்கள்

அவை மலர்களாய்ப் பூக்கும்
உன் பிரிய விரல்களால்
வருடும் பொழுதுகளில்

அன்பு மழையள்ளிப்
பொழியும் பொழுதுகளில்

இருந்தும்
நீ எந்தப் பூவினுள்ளும்
வீழ்ந்துவிடாதே

ஒருசில பூக்களிலோ
முட்களிருக்கலாம்

ஆயினும் உன் சுடுசொற்களால்
மெல்லிய இதழ்களையே
முட்களாய் மாற்றிக் கொள்ளும்
பூக்களும் உண்டு இங்கே

உன் நெஞ்சம்
உண்மையின் ஊற்றாகட்டும்
உன் செவியரும்புகள்
பிறருக்காய் பிரியமுடன் மலரட்டும்

மெலிந்தவனோ அறிவிலியோ
நீ விட்டு விலகும் அந்த
ஒன்றுமறியாதவனிடமும்
ஒரு கதை இருக்கிறது

பிறர் பிணிக்குச் செவி மடுத்தால்
உன் பிணி தூசல்லவா

ஆயினும்
கடும் விசத்தை அமுதெனக் கலந்து
நுனி நாக்கில் பரிமாறும்
கரு நாகங்களையும்
விரலுக்கு மோதிரமிட்டு
கைகளையே கழற்றிக் கொள்ளும்
பிறவித் திருடர்களையும்
விட்டு விலகிவிடு

அவர்களோ உன் ஆன்மாவுக்கு
விரக்தி சேர்க்கும் விச ஜந்துக்கள்

இம் மண்ணில்
உன்னிலும் உயர்ந்தோரும் உளர்
தாழ்ந்தோரும் உளர்
வீணே ஒப்பிட்டு
உன் நெஞ்ச நீரோடையில்
நஞ்சினைக் கலக்காதே

உனக்கென்று ஓர் உள்ளம்
அதில் உன்னுடைய என்று
சில எண்ணங்கள்
பிறகென்ன

மனசாட்சியெனும் வைரக்கால் பதிய
திடமாய் எழுந்து நில்

உன் இனிய எண்ணங்களில் வாழ்
ஈடற்ற சாதனைகளில் சிரி

Comments

Popular posts from this blog

அன்புடன் உங்களை அன்புடன் வரவேற்கிறது

சென்னை விழா நன்றியுரை

பிறந்தநாள் வாழ்த்துக்கள்

மகளின் பிறந்தநாள் வாழ்த்து

Ilayaraja Toronto 16 Feb 2013 (Part 1) - இளையராஜா டொராண்டோ

கண்ணீர் வரிகள் இதய வரிகளை மறைக்கின்றன

உடல் எடையைக் குறைக்க உருப்படியான வழிகள்