முத்தமிழ் இன்றியோர் வாழ்வேது

கவிதை என்பது மொழியுலகில் ஒரு கம்பீரமான யானை. அதை நிதிகேட்டுக் கையேந்த விடுவதில் எனக்கு உடன்பாடு கிடையாது. ஆயினும் தமிழ், தமிழ்ப் பண்பாடு, தமிழ் வளர்ச்சி, புலம்பெயர் தேசத்தில் தமிழ்ப் பிள்ளைகளின் ஈர நாவுகளில் தமிழ்ச்சொல் சேவை போன்றன  என்றால் அந்த யானையே தன் உள்ளப் பெருக்கோடு ஓடிவந்து நிதி கேட்டு ஒவ்வொரு தமிழரின் முன்னும் பாசத்தோடு அசைந்தாடி நிற்கும். ஏனெனில் கேட்பது அதற்காக அல்ல அன்னைத் தமிழுக்காக என்பதால்.

அமெரிக்காவின் சான் பிரான்சிஸ்கோ வளைகுடாத் தமிழ்மன்றம், ஒரு தமிழ்ப் பண்பாட்டு மையம் அமைக்க 2019 மார்ச் மாதம் ஓர் இசை நிகழ்ச்சி ஏற்பாடு செய்து நிதி திரட்ட முடிவெடுத்து, ஒரு விழா மலரும் வெளியிட்டது.  அம்மலரில் "நிதி மிகுந்தவர் பொற்குவை தாரீர்" என்ற கருத்துடன் ஏன் இந்த அயல் மண்ணில் நமக்கு ஒரு தமிழ்ப் பண்பாட்டு மையம் தேவை என்பதை ஒரு கவிஞரின் பார்வையில் சொல்லத் தகுதியான வட அமெரிக்கத் தமிழ்க் கவிஞர்களுள் ஒருவரான நீங்கள் ஒரு வாழ்த்துக் கவிதை எழுதித் தருவீர்களா என்று அன்போடு அழைத்தது.

ஆனால் அவர்கள் எனக்குக் கொடுத்த அவகாசமோ ஒரே ஒரு நாள் மட்டும்தான். உடனடியாக எடுக்கப்பட்ட முடிவின் காரணமாக அவர்களுக்கு வேறு வழியும் இருக்கவில்லை. முயன்று பார்க்கலாம் என்ற எண்ணத்தோடுதான் என்னிடம் வந்தார்கள். நானும் என் நிறுவனப் பணிச்சுமைகளுக்கு இடையே பணிநாள் ஒன்றில் இக்கவிதையை அவசர அவசரமாகப் படைத்துக்கொடுத்தேன். 

அமெரிக்கப் பொன்வானிலே
வெகு அழகான வைர நிலவாய்
மதுரத்தேன் வளைகுடாவில்
எழில் தவழ்கின்ற தமிழ்மன்றமே
     
தமிழ்மன்றப் பூஞ்சோலையில்
புதுத் தளிரொன்று துளிர்க்கின்றதோ
தமிழ்ப் பண்பாட்டு மையமென்றே
தனி நடைபோட்டு ஒளிர்கின்றதோ


இந்நாள் இந்நாள் இனியநாள்
இந்தத் திருநாள் தமிழரின் அமுதநாள்
கண்ணால் முன்னால் காணும்நாள்
இந்தப் பொன்னாள் தமிழரின் பெருநாள்

வந்தாள் வளர்ந்தாள் தமிழ்த்தாய்
இந்த வையத்தின் மையத்தில் கணித்தாய்
விதைத்தாள் விதைக்குள் முளைத்தாள்
பெரு விருட்சமாய்ப் பண்பாடு தழைத்தாள்

என்பாடு உன்பாடு எனப்பாடு
தமிழ்ப் பண்பாடு ஒன்றுதான் நிலைப்பாடு
வந்தாடு நின்றாடு வென்றாடு
தமிழ்ப் பண்பாட்டு மையத்தைக் கொண்டாடு

பண்பாடு புதைப்பது கண்ணியமில்லை
தமிழ் அடையாளம் தொலைப்பது தமிழினமில்லை
பண்பாடு காப்பதே தமிழனின் பெருமை 
தமிழ் அடையாளம் தோற்பதோ புழுவினும் சிறுமை

அமெரிக்கப் பொன்வானிலே
வெகு அழகான வைர நிலவாய்
மதுரத்தேன் வளைகுடாவில்
எழில் தவழ்கின்ற தமிழ்மன்றமே
     
தமிழ்மன்றப் பூஞ்சோலையில்
புதுத் தளிரொன்று துளிர்க்கின்றதோ
தமிழ்ப் பண்பாட்டு மையமென்றே
தனி நடைபோட்டு ஒளிர்கின்றதோ


வித்தகர் யாவரும் கூடிடுவோம்
அந்த விண்ணிலும் தமிழை ஏற்றிடுவோம்
முத்தமிழ் இன்றியோர் வாழ்வேது
தமிழ் முரசுகள் ஒலித்தே போற்றிடுவோம்

இரத்தமும் பீறிடும் தமிழாக
தினம் முத்தமும் ஊறிடும் தமிழ்பாட
பித்தமும் தெளிந்திடும் தமிழ்பேச
அந்தப் பேய்களும் வணங்கிடும் தமிழ்கேட்க

எத்தனைப் பொற்கரம் தமிழோடு
உயர் இமயமும் அற்பமே தமிழுக்கு
நித்திரை மறந்து தமிழெடுப்போம்
அந்த நீலவான் எங்கிலும் நட்டுவைப்போம்  
     
செல்வமும் செழித்தநற் தகையோரே
லட்சங்கள் வாரி வழங்கிடுவோம்
சிறுதுளிப் பெருவெள்ள இலக்காக
சில நூறுகள் எளியவர் ஈந்திடுவோம்
  
அமெரிக்கப் பொன்வானிலே
வெகு அழகான வைர நிலவாய்
மதுரத்தேன் வளைகுடாவில்
எழில் தவழ்கின்ற தமிழ்மன்றமே
     
தமிழ்மன்றப் பூஞ்சோலையில்
புதுத் தளிரொன்று துளிர்க்கின்றதோ
தமிழ்ப் பண்பாட்டு மையமென்றே
தனி நடைபோட்டு ஒளிர்கின்றதோ






அடடா அடடா கலிபோர்னியா

நான் கனடாவிலிருந்து அமெரிக்காவில் உள்ள கலிபோர்னியாவிற்குச் சென்றேன். எனக்கொரு வழக்கம். நான் எங்கு சென்றாலும் சென்ற இடத்து அழகினை என் உயிர்முட்டப் பருகி உணர்வு பொங்கப் பாடி மெல்லக் கூத்தாடி மகிழ்வேன்.

கலிபோர்னியா என்னை வெகுவாகக் கவர்ந்தது. பொற்பட்டுச் சிறகசைக்கும் பட்டாம் பூச்சியாய் என் இதயக் கொடியில் வந்து சிலிர்ப்பாய் அமர்ந்தது. பாடினேன் அதற்கொரு பாட்டு.

இந்தக் கவிதை வல்லினம் மிகக்கொண்டு இசைகூட்டிச் செய்யப்பட்ட சந்தக் கவிதை. தொடர் எதுகைகள் கோத்து இதயத்தில் மகிழ்ச்சித் தாளம் எழ கவனமாய் உருவாக்கப்பட்ட கடினமான நடை. ஆனாலும்
எளிமையான தமிழ். 

அடடா அடடா கலிபோர்னியா
அமெரிக்க மண்ணின் எழில்ராணியா
அழகோ அழகு கலிபோர்னியா

வட்ட வட்ட நிலவைத்
தொட்டுத்தொட்டுப் பேசும்
உச்சி மலைத்தொடரும் உண்டு

எட்டி எட்டிப் பார்க்க
தட்டுப்படா அடியில்
வெத்துப் பள்ளத்தாக்கும் உண்டு

நட்ட நடு வானை
முத்தமிட்டு ஆடும்
நெட்டை மரக்காடும் உண்டு

தொட்டுத் தொட்டுக் கரையில்
கட்டுக்கதை எழுதும்
சிட்டு அலைக்கடலும் உண்டு               

அடடா அடடா கலிபோர்னியா
அமெரிக்க மண்ணின் எழில்ராணியா
அழகோ அழகு கலிபோர்னியா

சுட்டுச் சுட்டு எரிக்கும்
பொட்டில் அனல்தெறிக்கும்
பொட்டல் வெளிப் பாலையும் உண்டு   

மொட்டு விட்டுப் பூத்து
வெட்டுங்குளிர் கோத்து
கொட்டும் பனித்தூறலும் உண்டு

நெட்டி கிட்டி முறித்து
தட்டுத் தடுமாறி
கெட்ட நில நடுக்கமும் உண்டு

வெட்டி வெட்டி எடுக்க
கொட்டிக்கொட்டிக் கொடுத்த 
கட்டித் தங்கச் சுரங்கமும் உண்டு

அடடா அடடா கலிபோர்னியா
அமெரிக்க மண்ணின் எழில்ராணியா
அழகோ அழகு கலிபோர்னியா

விட்டு விட்டு மேகம்
கொட்டிக்கொட்டிப் போகும்
பச்சை வயல் வெளியும் உண்டு

எட்டி எட்டிப் பார்த்து
விட்டுவிட்டுக் குமுறும்
வெள்ளை எரி மலையும் உண்டு

பட்டுச் சிட்டுப் போல
மெட்டுக்கட்டித் தாளம்
இட்டுச் செல்லும் நதிகளும் உண்டு

தட்டித் தட்டி உலகைக்
கட்டிக்கட்டி ஆள
விட்ட கணிப்பொறியும் உண்டு              

அடடா அடடா கலிபோர்னியா
அமெரிக்க மண்ணின் எழில்ராணியா
அழகோ அழகு கலிபோர்னியா

எட்டுப் பத்து மாடி
கட்டித்தரும் வலிமை
கிட்டித் தரும் செல்வமும் உண்டு

கட்டுக் கட்டு நோட்டுகள்
கொட்டிக்கொட்டிக் கொடுத்தும்
வட்டி கட்டும் செலவும் உண்டு

சொட்டுச் சொட்டுத் தேனாய்
பட்டுப்பட்டுக் கவிதை
இட்டுத்தர நானும் உண்டு

தட்டித் தட்டிக் கைகள்
கெட்டிமேளச் சத்தம்
கொட்டித்தர நீங்களும் உண்டு               

அடடா அடடா கலிபோர்னியா
அமெரிக்க மண்ணின் எழில்ராணியா
அழகோ அழகு கலிபோர்னியா




வாழ்க்கை இனிமையானது

வெறுமனே
காலிப்பாத்திரமாய்
அனுபவ வீணைகளை
மீட்டிப் பார்க்காத
பிஞ்சு விரல் நுனிகளுடன்

காலப் பனிக்கற்கள்
கரைந்த கணங்களில்
என்னில்
தெளிந்த நீரோடையாய்
வாழ்க்கை

0

சிந்தனைத் துளிகள் சொட்டச் சொட்ட
அனுபவ ராகங்கள் கேட்கக் கேட்க
ஞானப்பல் முளைக்க முளைக்க

நிம்மதி செத்துப் போய்
நித்திரை அற்றுப்போய்
விரக்தி ரொம்பிப்போய்

அப்பப்பா
இது என்ன வாழ்க்கை
என்றே கருகினேன்

0

வாழ்க்கை என்ற அரிய பயிர்
கருகியபின் ஓடிவரும்
அழகு நீரோடைதான்
அனுபவமாம்

விரக்தியோடு சொன்னார்கள்
கண்டுணர்ந்தவர்கள்

ஆயினும் என்னைப்
புதுப்பிக்கும் மனத்தோடு
பொறுமையாய்க் காத்திருந்தேன்

கடந்த கணங்களின்
அழுக்குச் சுவடுகளைக்
கழுவிக்கொண்டே நடந்தேன்

முடிந்த துயரத்தின்
இருட்டுப் பிடியிலிருந்து
உயிர்த்தெழும் உர உயிராய்ப்
பூத்தெழுந்தேன்

உச்ச இறுக்கத்தில்
சிக்கிக் கிடந்ததால்
அது வைரம்

தப்புகளும் தவறுகளும்
வாழ்வின் தடங்கள்

அந்த
ஓடுகளை உடைத்துக்கொண்டு
புதிய பிறப்புகள்
மீண்டும் மீண்டும் பூக்கும்

வாழ்க்கை எப்போதும்
வசந்த வரங்களைப்போல
வந்துகொண்டே இருக்கும்

உடல் ஒன்றுதான்
உயிர் பிரியுமுன் வரும்
ஜென்மங்களோ ஆயிரம்

வாசலைத்
திறந்துவைப்போம்
நம்பிக்கை கொண்ட
வாழ்க்கை இனிமையானது