இளமையா முதுமையா

இளமையின் வேகம்

தோல்வியின் சக்கரமா

வெற்றியின் ஏணியா

முதுமையின் நிதானம்

பாதுகாப்புப் பட்டையா

வாழ்வு பறிக்கும் தொல்லையா

v   

பயமறியா இளமை

சறுக்கியும் விழுகிறது

சாதித்தும் காட்டுகிறது

அனுபவ முதுமை

இழந்தும் நிற்கிறது

வென்றும் நிமிர்கிறது

v   

இளமை

தோல்விகளைப்

பொருட்படுத்துவதில்லை

பொருட்படுத்தாதவை

தோல்விகளாவதில்லை

முதுமை

தோல்விகளை ஏற்பதில்லை

அனுபவ நிதானத்தில்

தோல்விகள் வருவதில்லை

v   

இளமை அனுபவிக்கும்

சின்னச்சின்ன சிலிர்ப்புகளில்

முதுமை புல்லரிக்காது

முதுமை அனுபவிக்கும்

மௌன இன்பங்களை

இளமை சீரணிக்காது

v   

எல்லாவற்றையும்

தொட்டுத் தொட்டுச்

செலவாகும் இளமை

எல்லாவற்றுக்கும்

பழமொழி சொல்லும்

முதுமை

v   

இளமையின் காயம்

வெறும் தசைக் கீறல்

முதுவையின் காயமோ

எலும்பு முறிவு

v   

சிந்தனைச் சாதனை

முதுமையின் வெற்றி

செயலாற்றும் சாதனை

இளமையின் வெற்றி

நிதான முதுமையோடு

வேக இளமை

சேர்ந்ந்துவிட்டால்

தோல்வியென்பது

பொய்யாகிப் போகும்

v   

இளமையைப் கண்டு

முதுமை புத்துணர்ச்சி பெறுவதும்

முதுமையைக் கண்டு

இளமை சிந்தனை கொள்வதும்

இலவசக் கொடுக்கல் வாங்கல்

v   

பேரனிடம் சொன்னால்

நொடிப்பொழுதில் முடிப்பான்

என்று பெருமைப்படுவார் தாத்தா

என் தாத்தாவிடம் கேட்டால்

அற்புத யோசனைகளை

அள்ளிப் பொழிவார் என்று

பீற்றிக்கொள்வான் பேரன்