முத்தத்தமிழ் நாளும்நான் செய்வேன்

இனிய இணையத்தோரே,

தமிழ்மணம் என்னையும் அழைத்தது. நட்சத்திரப் பதிவாளன் என்றது. தமிழ் வானத்தில் நானும் ஓர் ஒளிப் புள்ளியாய் மினுக்கலாம் என்று உடனே ஒப்புதல் தந்துவிட்டேன்.

உங்கள் பின்னூட்டங்கள்தான் என் முன்னால் நின்று என்னை எழுத்துக்குள் அழைத்துச்செல்லும் ஒளிமூட்டங்கள். ஆகவே அன்பு இணையத்தோரே நீங்கள் ஒவ்வொருவரும் ஓர் பின்னூட்டப் பிதாமகன் என்று அன்புடன் நிரூபியுங்கள்.

கொஞ்சம் தமிழ், கொஞ்சம் காதல், கொஞ்சம் புதுக்கவிக்குறள், கொஞ்சம் கனடா என்று சில கொஞ்சங்களைப் பஞ்சமின்றிப் பொழியலாம் என்று ஆசைப்படுகிறது இந்த நெஞ்சு.

முதலில் தமிழ்மணத்திற்கு நன்றி கூறும் முகமாக ஒரு சந்தக் கவிதை எழுதி இருக்கிறேன். எப்படி இருக்கிறதென்று தொட்டுத் தடவிப் பார்த்து நாக்கில் இட்டுச் சட்டென்று கூறுங்கள். நன்றி


மணமே தமிழ்மணமே

இணையத்தின் வெளியெங்கும் மணமே - தமிழ்
. .இதயங்கள் பூப்பூத்துக் கனியாகும் தினமே
அணையில்லாக் காட்டாற்று மனமே - தமிழ்
. .அமுதத்தால் நிறைகின்ற சுகமொன்றே சுகமே

இணையில்லாச் சேவைக்கோர் மணமே - தமிழ்
. .இடுகைகள் திரட்டிடும் வெற்றித் தமிழ்மணமே
முனைவர்கள் அறிஞர்கள் வாழ்த்த - தமிழ்
. .முதற்பெருந் திரட்டியே வாழ்க நீ வாழ்க

நட்சத்திரப் பதிவாளன் என்றாய் - எனை
. .நன்றித்தேன் நதியாக்கித் தமிழ்போல வென்றாய்
முத்தத்தமிழ் நாளும்நான் செய்வேன் - வலை
. .முற்றத்தில் கொட்டித்தினம் இச்சாகத் தருவேன்